2024-жылдын 16-декабрында АЭУнун Экономика жана башкаруу факультетинин деканы Турдукан Бекимбетова жана Erasmus программасынын координатору Динара Эгембердиева менен Щецин университетинин (Польша) эл аралык кызматташтык боюнча координатору, PhD, профессор Мацей Чаплевскийдин ортосунда жемиштүү онлайн жолугушуу болуп өттү.
Бул жолугушуу эки университеттин мурунку биргелешкен академиялык иш-чараларга негизделген келечектүү кызматташтыгынын башталышын белгиледи. Расмий өз ара түшүнүшүү жөнүндө меморандум (MoU) али кол коюла элек болгонуна карабастан, эки университет билим берүү жана илим тармагында активдүү кызматташып келет. Мындай кызматташтыктын мисалы катары АЭУнун кадрлар бөлүмүнүн башчысы Канатбек Шамбеталиевдин профессор Мацея Чаплевскийдин жетекчилиги астында өткөн “Адам ресурстарын башкаруу боюнча инновациялык ыкмалар: практикалык мисалдар” аттуу тегерек столго катышуусун айтууга болот.
Онлайн жолугушуу учурунда университеттер келечектеги кызматташтыктын мүмкүн болгон багыттарын карап чыгышты, алардын ичинде:
- Туризм, улуттук бренд түзүү жана жашыл экономика жаатында биргелешкен изилдөө демилгелери.
- Туризм тармагында биргелешкен окуу программаларын же курстарды иштеп чыгуу.
- Кош дипломдуу программаларды ишке ашыруу мүмкүнчүлүктөрү ж.б.
University of Szczecin’s Institute of Spatial Management and Socio-Economic Geography менен АЭУнун Экономика жана башкаруу факультети ортосундагы синергияны эске алуу менен, эки тарап студенттер менен кызматкерлерди алмашуу программаларын ишке киргизүүгө кызыктар экенин билдиришти. Бул алмашуу Erasmus+ KA171 программасы жана эки тараптуу макулдашуулар аркылуу ишке ашырылмакчы.
Бул жолугушуу кызматташтыктын башталышы гана болуп, узак мөөнөттүү жана бекем өнөктөштүккө айланат. Тараптар мындан ары да үзгүлтүксүз онлайн жолугушууларды өткөрүү жөнүндө макулдашты. АЭУ профессор Мацей Чаплевскийдин 2025-жылдын март айында боло турган расмий сапарын чыдамсыздык менен күтүп жатат. Бул университеттер ортосундагы өнөктөштүк мамилелерди бекемдөөнүн маанилүү этабы болмокчу.
