2024-жылдын 15-мартында АЭУнун Экономика факультетинин студенттери каржы тармагындагы карьераны өнүктүрүү перспективасына арналган конок лекциясында Mazars компаниясынын алдыңкы адистери менен жолугушту. Mazars – аудит, финансылык консалтинг, бухгалтердик жана салыктык эсеп сыяктуу кызматтардын кеңири спектрин сунуш кылган эл аралык алдыңкы аудитордук жана аутсорсинг компаниясы. Финансылык экспертиза жаатында мыкты болгондугу үчүн Mazars дүйнөдөгү мыкты 10 аудитордук тармакка кирет.
Mazars компаниясы тарабынан уюштурулган лекция кесиптик карьера дүйнөсүнө кирүү алдында турган студенттер үчүн маанилүү болду. Адистер каржы жаатында кандай мүмкүнчүлүктөр ачылаары жана бул тармакка кантип ийгиликтүү кирүү керектиги жөнүндө бай тажрыйбалары жана билимдери менен бөлүшүштү.
Лекциянын негизги багыттарынын бири каржы тармагында ийгиликтүү карьера үчүн зарыл болгон атаандаштык көндүмдөрдү жана сапаттарды кантип алуу керектиги жөнүндө талкуу болду. Студенттерге теориялык билимди иш жүзүндө кантип колдонууну, татаал каржылык маселелерди чечүүнү түшүнүүгө жардам берген Mazars компаниясынын практикасынан реалдуу кейстер сунушталды. Мындан тышкары, адистер ийгиликтүү кесиптик өнүгүүнүн сырлары, анын ичинде тармактык байланыштын маанилүүлүгү, команданы жетектей билүү жана тез өзгөрүп жаткан рынокко көнүү менен бөлүшүштү. Жалпысынан, конок лекция интерактивдүү форматта өттү. Уюштуруучуларга пайдалуу лекция үчүн жана студенттерге активдүү катышкандыгы үчүн ыраазычылык билдиребиз.
